Tuesday, August 09, 2016

චීනාට තෑග්ගක් ගතිමි


මාස අටකට විතර පස්සෙ මගෙ යාළුවෙක් වෙච්ච චීනා ආයෙත් ලංකාවට ආවා. ඒ කාර්යාලයේ තිබ්බ වැඩමුළුවක් පවත්වන්න. එයා ලංකාවට ආපු තුන්වෙනි වතාව. කළිං පාරක ආපු වෙලාවෙ අපි ගංගාරාමෙ වෙසක් බලන්න ගියා. ඒ විස්තරෙත් ඕනෙ නම් මේ ලින්ක් එකෙන් බලන්න පුළුවන්. මේ ගමන මම එනකොට එයාට කිව්වා මට ෆෝන් එකක් ගේන්න කියලා චීනෙන්. යුවාන් 1300 කට එයා අළුත්ම හුවාවි ෆෝන් එකක් ගෙනත් දුන්නා බැක් කවර්, ටෙම්පර්ඩ් ග්ලාස්, සෙල්ෆි ස්ටික්, බ්ලුටූත් ස්පීකර් එක්ක වයර්ලස් හෙඩ්සෙට් එකකුත් එකක. ගානට නම් ඉතිං පට්ටම ලාබයි මොකද 2GB රැම් එක වෙනුවට 3GB කරල 16GB Internal වෙනුවට 32gb කරලත් හම්බවෙච්ච හන්දා.

දැන් ආයෙත් ට්‍රැක් එකට.

ඉතිං සති දෙකක් ඉඳල මෙයා යන දවසත් ආවා. මටත් ඕනෙ වුනා මොකක් හරි සිහිවටනයක් දෙන්න. ලක්සලේ ගනන් ගැන මම දන්න හන්දා වෙන කොහෙන් හරි බලන්න කියල බොරැල්ල පැත්තෙ නම් දරාපු කඩයකට ගියා. යාළුවා කිසිම ආගමක් අදහන්නෙ නෑ. එයා ෆ්‍රී තින්කර් කෙනෙක්. ඉතිං බුදුපිළිම දෙන්න බෑනෙ. වෙන පිළිම බැලුවා. අතට අහුවුන ඔක්කොම පිළිම made in China. හරිම සන්තෝසයි. මුළු කඩේම පෙරලගෙන බැලුවා. මේඩ් ඉන් සිරි ලංකා දෙයක් තිබ්බෙ නෑ. ඇඳුම් දීල වැඩක් නෑනෙ. ඉතිං එතනින් හැරිල ආවා.

ඊට පස්සෙ ගියෙ මරදාන පැත්තෙ නම් දරාපු කඩයකට. ඒකෙත් වෙනසක් නෑ. හොයනකොට හොයනකොට හම්බවුනා බිත්ති සැරසිල්ලක්. ඒක අනිත් අය ගත්ත හන්දා මම ගත්තෙ නෑ. නාගරාක්ෂ ගුරුලාක්ෂ ජසයා ලෙන්චිනා වගේ මූණු තිබ්බා. අපි වගේ සාමාන්‍යය පඩියක් ගන්න මනුස්සයෙක් 2500ක් 3500ක් දීල තෑග්ගක් ගන්නෙ කොහොමද? තියන ඔක්කොම  Made in China’ ලංකාවද චීනෙද කියල හිතුනා. හිතට හරියනනම Made in China කියල ගහල නැති ටේබල් ලෑම්ප් එකක් හම්බවුනා. එතන ඉන්න සහයකයෙකුට කියල ලෑම්ප් එක ටෙස්ට් කරන්න කරන්ට් එකට ගැහැව්වා.  ටේබල් ලෑම්ප් එකේ ෂේඩ් එක පත්තුවෙන්නෙ I Love China කියල.

අම්මෝ වෙලාවට ගහල ටෙස්ට් කලේ කියල හිතුනා.

එක පාරක් මම සීගිරි ගියපු වෙලාවක මේ වගේසිද්ධියක් වුනා. ඉතිං ලංකාව එහෙම තමයි.

තෑග්ගක් දෙනවද නැද්ද කියල හිත හිත ඉන්නකොට අන්තිමට හම්බවුනා පොල්කටුවලින් හදපු ඉබ්බෙක්. ඒකත් 350ක් ද කොහෙද?

බජට් එකට හරියන ඒවා චීනෙ හදන්නෙ. අපේ දේවල් අපේ බජට් එකට හරියන්නෙ නෑ.
ඉතිං හිත සනසාගෙන ඉබ්බව තෑග්ගට දුන්නා.